دیدار

دیداری دووربین له‌گه‌ڵ مامۆستا كرێكار

دیداری دووربین له‌گه‌ڵ مامۆستا كرێكار

دووربین: سه‌ره‌تا ده‌پرسین: دۆسیه‌ی مامۆستا كرێكار له‌ نه‌رویج به‌كوێ گه‌یشت؟ بۆچی ئه‌م تۆمه‌ته‌ی ئیتاڵیا كه‌ هیچ به‌ڵگه‌یه‌كی له‌سه‌ر نییه‌، داناخرێ به‌ڵكو دوا ده‌خرێ؟ نه‌رویجییه‌كان هۆكارن یان ئیتاڵییه‌كان.؟

مامۆستا كرێكار: بسم اللە، الحمدللە والصلاة والسلام علی رسول اللە ..

دۆسیەی (مەلا کرێکار) کە ئەوە شازدەیەم ساڵێتی لە نەرویج هەروا توول دەکێشێت و بەئەنقەست دەیهێڵنەوە، چونکە لە سەرەتاوە سیاسەتمەدارانی نەرویج کێشەیەکی زۆر زۆر گەورەیان بە ناوی (كێشەی مەلا کرێکار) دروستکردو خەڵکەکەی خۆیانیان _بۆ بەرژەوەندی حزبی پێترساند. هەر دوو بەرەی چەپگەراو راستڕەوەکان -وەکو یەک- کێشەکەیان لە کاتی هەڵبژاردنەکاندا دەهێنایەوە پێشەوەو کێبڕکێیان لەبەرچاوی گەلەکەی خۆیان دەکرد، هەر لایەکیان لافو گەزافی ئەوەی لێدەدا کە ئێمە لە ووڵات دەریدەکەین. هەر هەمووشیان دەیانزانی کە ئەمە لە دادگا یەکلایی دەکرێتەوەو ئەمانە هیچ لایەکیان بەڵگەی تاوانبارکردنی منیان پێنییە. کە بۆ جاری 62 ەم چوومەوە دادگای نەرویج راگەیاندنەکانیان زۆر بایەخیان بە هەواڵەکە نەدا! چونکە دەیانزانی گەلی نەرویجی لەم دراما سەخیفە بێزاربووەو نایەوێت چیدی ئاڵقەکانی تری ببینێت، بە تایبەتی کە پیاوانی یاسای ووڵات زۆر لە دژی سیاسەتبازەکان دەربارەی ئەم کێشەیە دەدوان.. ئەم کێشەیەی دواییش هەر وایە، نەرویج دروستی کردووەو ئیتالیا سەری لێیدەرناچێت. چونکە کێشەکە لە ئەساسەوە فشەیە.. ئیتالیا خەمی ئەوەیەتی ئەگەر وەرمبگرێت و بمداتە دادگای خۆی و پاشان بێتاوان دەرچم، دوایی چیم لێدەکات؟ نەرویج دەڵی کەیفی خۆتە چی لێدەکەیت بیکە!!! ئەوانیش دەزانن کە یان دەبێ مافی پەنابەرێتییم بدەنێ، یان دەبێ تەسلیم بە عێراقم بکەن ! ئێ ئیتالیا ئەم خوێنە ناخاتە ئەستۆی خۆی؟! کێشەکەش چونکە ئەوەلییاتێکی راستیی نییە، ئیتر خۆیان پێوەی موبتەلابوون.. منیش بە جەنابت چەند لەو کێشەیەدا هزرو هۆش و دەستت هەیە راستی منیش هەر ئەوەنده‌..

دووربین: ڕه‌وتی شاخ تاكه‌ی خه‌ریكی زه‌مینه‌سازی فیكری ده‌بێت؟ كه‌ی ده‌چێته‌ قۆناغی مه‌یدانی؟

مامۆستا كرێكار: زەمینەسازیی ئەفکار هەرچەند توول بکێشێت لە قازانجێتی مادام قۆناغەکانی بە لێوەشاوەیی ببڕێت. کورتکردنەوەی ماوەی داڕشتنی زەمینەی فیکریی زیان لە چەندێتی و چۆنێتی پێگەیاندنی کادیرەکان دەدات. رەوت قۆناغەکانی ستراتیژێتی خۆیی دیاری کردووەو بە هەنگاوی پارسەنگ ان شاءاللە دەیانبڕێت.  ئێمە نابێت لەژێر تین و فشاری واقیعەکەدا قۆناغەکان ببڕین، بەڵکو دەبێ بە پێی هاتنەخوارەوەی قورئان و قۆناغەکانی سییرە بیانبڕین.  واقیعی ئێستای کوردستان بە تەئکیید پێویستی بە بزاوتێکی عەقائدیی سیاسیی شەعبیی هەیە تا ئەم هەموو گەجەرو گوجەرە"قەومیی" و "ئیسلامیی"یانە راداتە زبڵدانی مێژووەو بەدیلێکی دڵسۆزو سەرراست و لێهاتوویان بخاتە بەردەست. واقیعی ئێستای کوردستان لە هەموو روویەکەوە چاوەڕوانی ئەو بەدیلەیە. بەڵام ئەمە نابێت ئێمە شپرزە بکات و ناچارمان بکات چاوپۆشیی لە هەندێک لایەنی پەروەردەکاریی و ئامادەسازیی بکەین و بڵێین بافریاکەوین!! نا، کەس خەمی ئەوەی نەبێت کە "ئەم هەلە"مان لەدەست دەچێت.. من تەمەنم 62 ساڵە لە سەرەتای ساڵی 1971 ەوە تا ئێستا زۆر هەلی وام دیووە. ئەگەر ئێمە خۆمان بە مەنهەج و کۆمەڵکاریی و بزاوتی شیاو تۆکمەتر سازدەین، هەلەکان دێنەوە بەردەست ان شاءاللە. چونکە کوردستان وڵاتی مێلیشیاییە، دەوڵەتێکی مەرکەزیی نییە تا شۆڕشکردن تێیدا زەحمەت بێت.. دەبێ بە پێی قۆناغەکانی سییرە ببزوێین، بە (ئیمان) و تەکالیفەکانی، ئینجا بە (هیجرەت) و بۆ خوا لێبڕانی، پاشان بە (جیهاد) و بەردەوامبوون و تێکۆشانی..

   هەر کاتێک رەوت گەیشتە ئەو قەناعەتەی کە پێویستە لە قۆناغی ئێستایەوە بچێتە قۆناغی داهاتووی. بڕیاری دەستەجەمعی خۆی بۆ دەردەچێت ان شاءاللە.

دووربین: پرۆژه‌ی (ئه‌هلی حه‌ل و عه‌قد) له‌م هه‌لومه‌رجه‌دا چ رۆڵێكی ده‌بێت؟ ئه‌و پرۆژه‌یه‌ به‌ كوێ گه‌یشت؟ ئایا ئه‌و ئه‌نجوومه‌نه‌ دروست ده‌بێت؟

مامۆستا كرێكار: پرۆژەی ئەهلی حەلل و عەقد (أحد) پرۆژەیەکی درێژخایەنە. پێکهێنانی مەرجەعییەتێکی ئیسلامییە کە توانای یەکلاکردنەوەی راجوێییە فقهیەکان و شیکاری سیاسییانەی واقیعەکەو قودرەتی رێکخستن و دامەزراندنی بەیتولمال و بەگەڕخستنی ووزەو تواناکانی لە کۆمەڵکارییەکدا هەبێت. مەرجەعییەتێکە بە رای خۆی و هێزی شوێنکەوتووانیەوە دەبێتە کۆمەڵی تین و فشار لەسەر بەرپرسانی کوردستان. ئەهلی حەلل و عەقد (ئەحەد) رێکخراوە بەڵام حزب نییە، لە ئاڕاستەی جیاوازە، بەڵام بەرەی حزبایەتی نییە، کە وابزانین لە کەسایەتی حزبە ئیسلامییەکان پێک دێت. نا، ئەحەد (ئەهلی حەلل و عەقد) ئاڕاستەوانێکی پێشڕەوێتی جەماوەرە کە بۆ بەرچاوڕوونیی خەڵکەکە بەردەوام راوبۆچوونی شەرعیی دەخاتە بەردەست، تا خەڵکەکەمان ئەوەندە پەرتەوازە نەبن و سەرگەردانانە بەملاولادا نەڕۆن.  بەردەوامین لەسەر کاربۆکردنی و الحمدللە کەسانێکی شیاوی شەرعناس و شیکارو ئەهلی نفووز وەریانگرتووەو پێیان وایە کە (ئەحەد) چوارچێوەیەکی شەرعی کۆمەڵکارییەکی ناحزبیانەی باشە.. ئەمما کەی رادەگەێنرێت ؟ جارێ نازانم بەڵام من پێنج مانگم هەر بۆ گەیاندی پەیامەکەی و روون کردنەوەی داناوە. دەبێ ماوەیەکی باشیش گوێ لە راوبۆچوونی بەڕێزانی تر بگرمەوە تا وای ساز بکەین ببێتە پرۆژەی کۆمەڵکاریی . ئینجا دوای ئەوە بە دەستەجەمعیی بڕیارەکانی دەردەچێت ان شاءاللە، لەوانەش بڕیاری راگەیاندنی..

دووربین: جه‌نابتان په‌یامێكی ڕێبه‌رییتان بڵاوكرده‌وه‌ تێیدا به‌خه‌ڵكی كوردستان و ڕه‌وته‌وانانتان وت: ئه‌م قۆناغه‌ بكه‌ن‌ به‌ (قۆناغی نا)و ده‌نگ به‌هیچ كه‌سێك مه‌ده‌ن. ئایا ئێستاش هه‌ر له‌سه‌ر هه‌مان ڕای و ئه‌و قۆناغی نایه‌ به‌رده‌وامه‌؟!

مامۆستا كرێكار: بەڵێ بە تەئکیید هەر بەردەوامەو زیاتریش جەختی لێدەکەمەوە. لێرەشەوەو لە هەموو مینبەرەکانی ترمانەوە بە هەموو خەڵکی بە گشتی و خۆشەویستانی جوامێر بە تایبەت رادەگەێنم کە کەس بەشداری هەڵبژاردنیان نەکات، نە هەڵبژاردنی ئەنجومەنی نیشتیمانی عێراق و نە ئەنجومەنی نیشتیمانی (پەرلەمان)ی کوردستانیش.. توخنیان مەکەون و نەفرینیان لێبکەن، کۆن و نوێی ئیسلامیی و عەلەمانییان فڕێدەنە زبڵدانی مێژووەوە. مەڵین ئەی چۆن ئیدارەی کوردستان دەڕوات؟ دڵنیابن چۆن رۆیشتووە بە خەڵکی نوێش هەروا دەڕوات، بە گۆڕینی دەموچاوەکان سیستم و دەستوور و شەقاوەیەتیی مێلیشیایی پارتی و یەکێتی ناڕوات. مەسعوود بارزانی هەر هەموو پارلەمانتاران و بیرمەندان و رۆشنبیرانی قەومیی و ئیسلامی و بێلایەن و باقی گەلەکە داوایان لێکرد بەسە، واز لە  سەرۆکایەتییەکە بێنە! وازی نەهێنا تا ئەمریکا هەڵیدایە کەنارەوە.. ئێرە وڵاتی سیاسەتمەداری خوانەناس و مێلیشیای شەقاوەو میدیای چەقاوەسووی عەلەمانیەتی بێشەرمە.. ئێمەی رەوتەوان نابێت لەو چەواشەکارییەدا بەشداربین، نابێت ئێمەش ئەو دیووەخانە پەڕپووتە بێکارە وا پێناسە بکەین کە پەرلەمانە، نابێت بڵێین ئەمەی بە حوکما هەڵزناوە حکومەتە. ئەمە مافیاو دزو جەردەو جەللادە.  نابێت بڵێین ئەم کۆمپانیایانە رەنجی دەوڵەمەندە شەریفەکانی وەکو ئەحمەد ئیسماعیل و حاجی محمـدی بامۆکین و زەخیرەی ووڵاتن، دەبێ بیانناسێنین کە ئەمانە ماڵی دزراوی گەلەکەیەو لە لایەن سەرمەیەدارانی بندەستی ئیحتیلالەوە زەوتکراون، ئەمانە موڵکی بەیتولمالن و سەد ساڵی تریش بێت دەبێت بگێڕرێنەوە بۆ خەزێنەی گشتی.. دەبێ زۆر بە جورئەتیش بین لە راگەیاندنی حەقدا. دەبێ نەهێڵین چاوپلاستیکییەکان لەشەڕەپاڵی قەشمەرێتی هەڵبژاردنەکاندا کڵاوبکەنەوە سەرمان و خوێمان لێ بکەن بە شەکر.  نەفرین لە پەرلەمانی کوردیی، هەزارو یەک لەعنەت لە حکومەتە یەکلەدوای یەکەکانی کوردستان: (كَفَرْنَا بِكُمْ وَبَدَا بَيْنَنَا وَبَيْنَكُمُ الْعَدَاوَةُ وَالْبَغْضَاءُ أَبَدًا حَتَّىٰ تُؤْمِنُوا بِاللَّـهِ وَحْدَه).

دووربین: راتان چییە لەسەر ئەو ئیسلامیانەی چوونەتە ناو ئەم حزبە عەلەمانییە نوێیانەی وەکو (هاوپەیمانی بۆ دیموکراسی و دادپەروەریی) بەرهەم ساڵحەوە. وەکو ئارام قادری کۆمەڵ و محمـد رەئووفی یەکگرتوو و ئەوانە؟

مامۆستا كرێكار: پێم وایە ئەو کەسایەتییە ناودارانەی کە چوونەتە ناو ئەو (هاوپەیمانی بۆ دیموکراسی و دادپەروەریی) عەلەمانیەوە، وەکو ئارام قادرو کاک جەلال و سەرگوڵ قەرەداغی (ئەگەر راست بێت و ئەویش چووبێتەناویی) و محمـد رەئووفی یەکگرتوو مورتەددن و لە دین و ئوممەتی ئیسلام چوونەتە دەرەوە، چونکە بە زانینەوە کوفریان هەڵبژاردووە .. هەر یەکێک لەمانە زانیویانە ئیسلام سیستمی حوکمڕانی خۆی هەبووە کە لە دەقە شەرعییەکانی خۆیەوە هاتوون. زیاتر لە 500 ئایەت و 3000 فەرموودە لەسەر دەسەڵاتی سیاسیین، بە هەر سێ دەسەڵاتەکەیەوە: وەکو شورا/21  کە لەسەر یاسادانانە (کە پەرلەمان ئالییەتێتی)، مائیدە/45 لەسەر حوکمڕانی (کە حکومەت ئالییەتی جێبەجێکردنێتی)، نیساء/64 لەسەر داوەریی (کە دادگا ئالییەتێتی).  زانیوویانە کە 1291 ساڵ ئیسلام حوکمی بە دەستووری خۆی کردووە کە شەریعەتەکەیەتی. زانیویانە عەلەمانییەت جوێکردنەوەی دینە لە سیاسەت، لە دەوڵەت، لە دەستوورو یاسا.. زانیویانە کە ئەمە لە ئیسلامدا کوفرە بەبەڵگەی دەیان ئایەتی قورئان، چونکە ئەم رەفتارەی ئەوان وەرگرتنی بەشانێکە لە ئیسلام و رەتکردنەوەی بەشانێکی ترێتی.. قبووڵکردنی دیموکراسییەکە بە هەموو شێوەیەکی کوفرە. ئینجا باوەڕبوون بەوەی کە ئەو دادپەروەرییەی بەرهەم صاڵح دەیهێنێتەدیی لەوە گشتگیرترو چاکترە کە ئیسلام دەیهێنێتەدیی، ئەمە خۆی وەکو ئیمامی ئیبنوتەیمییە لە بەرگی دەیەمی مەجمووعی فەتاوادا دەفەرموێ: بە کۆدەنگی پێشەوایانی دین: کوفرە.. کەوابوو ئەمانە بە زانینەوە دیدو ڕی و ئالییەتی کوفریان هەڵبژاردووەو هیچ گومانم لە مورتەددبوونیاندا نەماوە.. ئەوەی ئەمانەش کردوویانە وا نازانم لە ئەندۆنیسیاوە تا مەغریب کەس کردبێت، هیچ کۆمەڵە موسوڵمانێک نەبووە ئاوا دەستەجەمعیی چووبنە ناو حزبێکی عەلەمانییەوە کە دەسەڵاتیشی لەدەستدا نییە، بە هاوپەیمانیش نەچوون وەکو حزبی نەهزەی تونسی، بەڵکو بە ئەندامێتی و خۆساغکردنەوە بۆ دیدی رێی ئەو حزبە چوون و بە ئیختیاری خۆیان فکرو مومارەسەی ئەو حزبە لادینییەیان هەڵبژاردووە. واللە اعلم

دووربین: له‌سه‌روبه‌ندی ریفراندۆم پێش هه‌موو كه‌سێك ئێوه‌ دژی ئه‌و پرۆسه‌یه‌ بوون. ئایا له‌به‌ر ئه‌وه‌یه‌ ئێوه‌ دژی ده‌وڵه‌تی كوردیین، یان خودی گشتپرسییه‌كه‌تان به‌لاوه‌ پووچ بوو.؟

مامۆستا كرێكار: نا من لەو زەمانەوە کە خۆم تێدا ناسیووەو زانیومە خیلافەت و ئوممەتی موسوڵمانمان نەماوە تا ئێستاش دژی دەوڵەتی کوردیی نیم و حەزم بە دامەزراندنی دەوڵەتی کوردستانی خۆمانە تا ئەم کوردەش وەکو هەموو گەلێکی تر کیانی خۆی هەبێت. موسوڵمانانی کوردیش هێزی گۆڕانکاریی ریشەیی ئەم دەوڵەتە کوردستانییە بن، بەڵام ئەمە هەر هیواو ئاواتێکە کە ئێستا خەریکە لە خەیاڵ دوورتربێت. من دژی ریفراندۆمەکە بووم چونکە چەواشەکارییەکی پارتی بوو. ووڵات کە نە ژێرخانی سیاسیی و ئابووریی خۆی ماوەو نە سەرخانی دین و دەستوورو قییەم، دەوڵەت لەسەر چی دادەمەزرێت؟ لەسەر چ دەزگایەکی دەوڵەتیی؟ لەسەر چ ئەقڵییەتێکی سیاسی شەرعیی یان دیموکراسی کە هیچیان لە سیاسەتبازانی پارتییدا نین؟! دەوڵەت لەسەر چ ئازادییەک دادەمەزرێت کە پارتی و یەکێتی زیندانی "حکومیی" و زیندانی "حزب"یی و زیندانی لاکۆڵانیان هەیە؟! دەوڵەت چۆن لەسەر هیوادرۆزنە دادەمەزرێت؟ کە دەبینین مووچەی شەش مانگ نادرێت و مووچەی کەمئەندامان بڕاوە؟! لە قەزای دوکان ئاوی خواردنەوە نییەو لە قەزای دوبز کارەبا نییەو لە شارەزوور تەماتەی ئێران دەفرۆشرێت و لە پشدەر گوڵەبەڕۆژەی تورکی و لە هەولێری پایتەختە کاولەی فشەکوردایەتییەکەش ماستی یۆنان بازاڕی گرتووە !!

دووربین: هۆكاری رووخانی ده‌وله‌ته‌كه‌ی ئه‌بوبه‌كری به‌غدادی چی بوو؟ كاریگه‌ری بوون و نه‌مانی ئه‌و رێكخراوه‌ چیه‌؟!

مامۆستا كرێكار: هۆکار زۆرن. هۆکاری ناوەکی و هۆکاری دەرەکیی.. هۆکاری سەرەکی ناوەکی نەبوونی فرەدیدیی بوو، کە ئەو هەموو خوێنڕێژییەی لێکەوتەوە. هەردەبوو ئەو هەموو کوشتارە ناهەقەی لەو خەڵکەو لەو هەموو جیهادییانە کرا دەولە بگەێنێتە ئەوەی کە زانایەکی شەرعناس روویان تێنەکات و ئاوا لایەنگرانی هەڵوەرێن.. ئەمە چۆن دەشەرعێنرێت کە کەسانێکی عەشیرەتێکی وەکو (شعێطاط) کە گوایە لە بەیعەتدانیان پەشیمانبوونەتەوە بەڵام دوایی حەملە بکرێتە سەر ناوچەکەیان و 700 پیاویان بکوژرێت بەم تۆمەتە؟! یان زیاتر لە 3500 موجاهیدی بۆ خوا لێبڕاو لە جەنگەکانی دەولەدا دژ بە ئەنصارو قاعیدەو ئەحرارو ئەوانیتردا کوژران! ئەبومحمـدی قەحطانی وەزیری راگەیاندنی دەولە رحمەاللە دەیووت (سنحرر المحرر) واتە ئەو ناوچانەی ئازادکراون لە رژێمی بەششار ئازادیان دەکەینەوە لە کۆمەڵە جیهادییەکانی تر کە دەولە بە کافری دانابوون ! یان موجاهیدی طالیبانیان لەو دوورەوە گرت و لوغمیان خستە ژێریان و بە کۆنترۆڵ تەقاندنایننەوە بە تۆمەتی ئەوەی ئەمانە بە پەیمانی سایکس پیکۆ رازین!! داماوێکی ئەفغانی چوازانێت سایکس پیکۆ چییە؟! ئێ عاقیبەتی ئەمە هەر ئەوەیە کە شمشێرەکەت بەر سەری خۆت دەکەوێتەوە.. پاشان هۆکاری دەرەکی. دەولە جگە لە ئەردەن هێرشی کردە سەر هەموو ئەوەی دەستی گەیشتنێ.. خەتەرترینیان تورکیابوو. چونکە دەبوو ئەوەیان لەبەرچاو بێت کە تورکیا چاوپۆشی لەوەکرد کە بەهێزببن، چاوپۆشی لەوە کرد کە 000ر35 دینداری دنیا لە تورکیاوە هاتنە ریزیانەوە.. ئەو کاتەی لە حەلەب و ئیدلیب بەهێزبوون، ئەو هەموو چەکەیان لەرێی سنووری تورکیاوە تەئمین کرد. دوایی بە سیاسەتی هەڵەی خۆیان تورکیایان _کە لەژێر تین و فشاری ناتۆدابوو_ راکێشایە بەرەی بەرامبەر خۆیان. دەولە _خواش دەیزانێت_ دەیتوانی بەو هەموو ئیمکانیاتەی کەوتە بندەستی دەوڵەتێکی بەهێز دروست بکات. ئەگەر پشوودرێژانە بکەوتایەتە دامەزراندنی دەزگاکانی سیستمی خیلافەت.. دەولە هەشت ملیۆن کەسی لەژێر دەستدابوو، 5ر31 ملیار دۆلاری لە بانکەکاندا دەسکەوتبوو، واریداتیشی زۆر بوو، چەکی نوێی سێ لیوای سوپای عێراقی کەوتبووە بندەست، سەدهەزار چەکداریی هەبوو. جگە لە فڕۆکە هەموو چەکێکی مۆدێرنی هەبوو. پارەی ئیسلامی هێنابووەوە کایەوە.. پسپۆڕێتی لە هەموو بوارەکانی ئیدارەی دەوڵەتدا هاتبووە بەردەست.. بە راگەیاندنی خیلافەتەکەش دەکرا ئەو فەراغە پڕکاتەوە کە نزیکەی سەد ساڵە لە ئوممەتەکەدا هەیە. دەیتوانی _لەجیاتی ئەوەی بە شۆفڵێک ساترە خۆڵەکەی سنوری عێراق و سوریا لابدات_ پشوودرێژانە خۆی بە دانیشتوانی ووڵاتەکانی دەوروبەریی بیناکات (وەکو ئیران بە عێراق و بە بەحرەین و بە پاکستان و بە شیعەی ووڵاتانی تر خۆی بینادەکات) و لەگەڵ ووڵاتانی تریشدا دەیتوانی پراگماتییانە (سیاسەتی بەرژەوەندیی پاراستن) رەفتاربکات، هەروەکو کە لەسەرەتایدا لەگەڵ ئەردەندا کردی..  پێم وایە هەبوونی دەولە خراپیی زۆری لێکەوتەوە، بەڵام نەمانیی کارەساتی زۆری لێکەوتۆتەوە.. دەولە لەم سەدەی بیستویەکەمدا دیدوڕێی بزاوتی توندڕەویی وەهابێتییەکەی کردبووە مەنهەجی دین و دنیا، کە پڕە لە غلوو  و تەکفیرکردن..

دووربین: به‌بڕوای جه‌نابتان كێ خاوه‌نی خیانه‌ته‌كه‌ی 16ی ئۆكتۆبه‌ره؟ كورد و موسڵمانانی ئه‌هلی سوننه‌ تاچه‌ند لێی خه‌ساره‌تمه‌ندن؟

مامۆستا كرێكار: خیانەتی 16ی ئۆکتۆبەری 2017 لە کوردو کوردستان _بە تایبەتی لە دانیشتوانی ناوچە داىڕاوەکان_ لە کەس شاراوە نەبووە تا زانینی ببێتە مەتەڵ.. سەرەتای داوەکەو کۆتایی تەونەکە هەر وا لای خانەوادەی خیانەتکاریی جەلال تاڵەبانی. ژن و کوڕو برازاو کەسوکارە نزیکەکانی _ کە هەموو لە خیانەتکاریی تروکاون_  هەموویان شانازیی بەو خیانەتەوە دەکەن و بە چاوێکی ئێجگار قایمەوە رایانگەیاندووە کە ئێمەبووین 51٪ی باشووری کوردستانمان تەسلیم بە حەشدی وەحشی و قاسم سولەیمانی کردو بە شانازییەوە باسی دەکەن... ئامما کێ لێی زەرەرمەندە؟ هەموو کورد جگە لە خیانەتکاران و هاوبارانیان. ئەگەر مەبەستت لە ئەهلی سوننەت دانیشتوانی سێگۆشە سوننیەکەی عێراق بێت، ئەوە خۆیان بەرپرسی یەکەمی کارەساتەکانی خۆیانن، بە تایبەتی حزبی ئیسلامی و کەسایەتییە سیاسییە دەرکەوتووەکانیان.

دووربین: مردنی نه‌وشیروان مسته‌فا و جه‌لال تاله‌بانی جیاوازیان چی بوو؟ بۆچی هه‌ڵوێستی جه‌نابتان بۆ هه‌ردووكیان وه‌كو یه‌ك نه‌بوو؟ ئایا هه‌ردووكیان خاوه‌نی یه‌ك بیروباوه‌ڕی لادینی نه‌بوون؟

مامۆستا كرێكار: بەڵی راستە هەردووکیان خاوەنی بیروباوەڕی لادینیی بوون، بەڵام کەسایەتییان زۆر جیاوازبوو. جەلال تاڵەبانی لە 18 ساڵییەوە کە چالاکوانی پارتی دیموکراتی کورد بوو تا ئەو ساتەی دەستی بۆ کۆتا ئیمزا جوڵا خیانەتکاربوو، بە کۆڵ بردیانە ئێران تا خیانەتەکەی 16ی ئۆکتۆبەری 2017 ئیمزابکات.. شاهیدیدانی قاسم سولەیمانی لەسەر گۆرەکەی ئاغای طاڵەبانی بۆ بەڵگەی عەمالەتێتی بەسە، کە ووتی :(ئاغای طاڵەبانی موجاهیدێکی گەورە بوو، خزمەتی شیعەو سوننی و عەرەب و تورکمان و کوردی کرد)! ئەی بۆچی کەس لەسەر گۆڕی نەوشیروان مستەفا واینەووت؟ جەلال تاڵەبانی کە بوو بە سەرۆک لە پرۆفایلەکەیدا نووسی کە شیعەی ئیمامییە! بۆیە ئێستا ئاڵا تاڵەبانی بێچاووڕوو دەڵێ ئێمەی خانەوادەی تاڵەبانی لە عەشیرەتی بەنوئەسەدی شیعەین!! ئاغای طاڵەبانی هەرچی لێوەی نزیکبوو کردنی بە سەرۆک مافیاو جەردە. ئەمانە چۆن بە دەوروبەرەکەی نەوشیروان مستەفا بەراوورد دەکرێن..

   نەوشیروان مرد پەیڕەوو پڕۆگرامیێکی سیاسیی تۆکمەو کۆمەڵیكی دەزگایی و نوخبەیەکی رۆشنبیریی سیاسی و پێگەیەکی جەماوەریی شەعبیی بەجێهێشت، ئاغای طاڵەبانی کە رۆیشت یەکێتی بە حەوت باڵی پەرتەوازەی خۆخۆرو گومڕای بێ مەنهەج و بزاوتی خیانەتکاریی بەجێهێشت.. خاڵی بەراووردی ئەم دوو کەسایەتییە کوا وەکو یەکن؟! مەگەر هەر ئەوەندی بڵێیت هەردووکیان سەرکردەبوون! چۆن سەرۆک عەشرەتێکی پێشمەرگە کە فەرماندەبووبێت بەراوورد ناکرێت لەگەڵ سەرۆک عەشرەتێکی موستەشار کە فەرماندەی جاش بووبێت، ئەم دوو سەرکردەیەش ئەوەند لێک جودا بوون خاڵی هاوبەشیان مەگەر پلەی سەرکردایەتییەکەیان بووبێت یان ئەوەی کە هەردووکیان نێرینەبوون!

   ژنی تاڵەبانی وەکو خاتوو ئیلینای ژنی نیکۆلای چاوشیسکۆی رۆمانیایە کە وەکو مێردەکەی هەموو شتێکی خستبووە ژێر دەستی خۆی . یان وەکو بێوەژنەکەی ماو تسی تۆنگ پێش ئەوەی حزب رسوای کات و دەسەڵات و سامانی گەلی لێببسەنێتەوە.. ئەم مسز ریچەی ژنی جەلال هەموو شەوێک 300 تانکەری نەوتی دزراوی لە دەروازەی پەروێزخانەوە بۆ ئێران بۆ ئاودیو دەکرا، ئێ کە سەیری ئەم ژنەی ئاغای طاڵەبانی و ژنی نەوشیروان مستەفا دەکەیت، خاڵی هاوبەشییان لە نێواندا نابینیت. مەگەر هەر ئەوەی بڵێیت هەردووکیان مێینەبوون.

  پاشان بڕوانە دوو کوڕە هەتیومچەکەی ئاغای طاڵەبانی _کە وەکو عودەی و قوصەی صەددامن_ کلکانی زایۆنیزم و ئیسرائیل و ئێران و لۆزەندەرانی تری جیهانن، بێ سەوادو هێڕو بوودەڵەی فکرو سیاسەتن.. ئایا ئەمانە وەکو دوو کوڕەکەی نەوشیروان مستەفان کە نە لە زەمانی باوکیانداو نە لە زەمانی دوای باوکیان پلەو پارەو پۆستیان نەبوو؟!

خەڵکی سلێمانی کە سەیری حاکم قادری دزو مشەخۆری ئاغای تاڵەبانی دەکەن و سەیری عومەری سەید عەلی جێگری نەوشیروان مستەفا دەکەن، خاڵی هاوبەش لە نێوانیاندا نابینن مەگەر ئەوەندەی کە هەردووکیان نێرینەن!!

من پێناسەی هەردووکیانم لە سیفەتی خۆیانەوە هێناوە، نەک لەوەی من حەزم کردووە چۆن بن، یان سیفەتی نازاتیی خۆیانم پێوەلکاندبن..

دووربین: لادانی مه‌سعود بارزانی. پرۆسه‌یه‌كی یاساییه‌؟ یان تاكتیێكی پارتییه‌؟ یا زه‌ختێكی سیاسیی ئه‌مریكییه‌؟ وه‌ چ كاریگه‌رییه‌كی ده‌بێت؟

مامۆستا كرێكار: کەناردانی ئەمریکاییەکانبوو.. دەنا خۆی وایدانابوو وەکو جیڤاراو ماوو ولینین یان وەکو ئیمام خومێنی و جەمال عبدالناصرو سۆکارنۆ  لەدوای مەرگیشی هەر حوکم بکات.. پارتیش وایدانابوو کە تا ئەبەد وەکو حافز ئەسەدی سوریا هاواری بۆ بکەن: (رئیسنا الی الأبد..... الأمین حافظ الأسد)..  کابرا بە پارەو ئینتیمای عەشرەت و حزبەکەی کاریگەریی لەسەر حزبەکەی خۆی هەر دەمێنێت، هەروەها لەسەر عەشرەتەکەی، چونکە نێچیرڤان بارزانی لە ناو حزب و عەشرەتەکەدا زۆر مەرغووب نییە، ئەوە ئەمریکایە کە ئەوی لاداوەو ئەمی هێناوەتەپێش نەک حزب و عەشرەتەکە کە بناغەو کۆشکی رەمزەکانیانن. وا دەزانم پاش لاچوونی (ترامپ و تیلەرسۆن) مەسعوود بارزانی _وەکو عەلی عبداللە صاڵحی یەمەن_ دەردەکەوێتەوەو ئەمیش لەسەر سەری مارەکان گەمەیەکی سیاسی تر دەکاتەوە! هەقی خۆشیەتی..

دووربین: له‌ت له‌ت بوونی چه‌ند حیزبێك و هاتنه‌ كایه‌ی حیزبی تازه‌، له‌ سوودی كێیه‌؟

مامۆستا كرێكار: سوودی ئێرانە.. بۆیە ئەوە هەر لە زۆنی سەوزدا روودەدات. نابینیت گرووپەکانی شیعەی عێراقیش هەزارو یەک لەتن.. لە کۆی 98 گرووپی حەشدی وەحشی 44 گرووپیان لە لایەن ئێرانەوە چەکدار کراونو ئێران ئاڕاستەیان دەکات.. ئەوە ستراتیژێتی ئێرانە کە لەو شوێنانەی دەستی دەیانگاتێ دروشمەکەی ئیستیعمار دەکاتە پلانی خۆی کە دەڵێ: (فَرِّقْ تَسُدْ: جیاکەرەوەو ببەرەوە).. ناهێڵێت هێزێکی وا پەیدا ببێت خۆی بڕیاری سەربەخۆی بدات تا هەموویان سەر بە خۆی بن..

دووربین: پێتان وایه‌ شاسوار عبدالواحید ده‌توانێ رۆڵێكی باش ببینێت بۆ گۆڕانكارییه‌كی ریشه‌یی؟

مامۆستا كرێكار: پێم وانییە.. خۆی و حزبەکەی بۆ کەشێکی وەکو فەرەنسای دیموکراسی دەشێن.. نەک بۆ کوردستان. ئەو نە کەسایەتییەکی کاریزمی وایە زاڵبێت بەسەر ئەو هەموو سیاسییە کۆنانەی لە فێڵکارییدا وەکو پیرەمار تووکیان دەرکردووە،  نە فیکرێکی پێیە کێبڕکێ لەگەڵ ئەفکاری عەلەمانیی و ئیسلامیی ساحەکەدا بکات، نە بەرنامەیەکی سیاسیی پێیە لە بەرنامەی بزوتنەوەی گۆڕان تۆکمەتربێت، نە هێزێکی هەیە پارت و یەکێتی سڵی لێبکەنەوە. هەر بەوەندەش نابێت سەناتۆرێکی ئەمریکایی یان لۆردێکی بەریتانی پێشوازیت لێبکات، کە لە راستییدا ئەمە خۆی جێی گومانە، کە کێ هەڵسوڕینەری حەقیقی ئەم کەسایەتیی و حزبەیە؟ گۆڕانی ریشەیی لە کوردستاندا بە فکرێکی رەسەنێتی و نوێخوازیی دەبێت.. رەسەن کە لە ناو کورددا رەگی داکوتابێت. نوێخواز کە شارستانێتی و مەدەنێتی و تەکنۆلۆجیا سەردەمی لەخۆگرتبێت..

دووربین: ناساندی قودس به‌ پایته‌خی ئیسرائیل له‌یه‌لان ترامپه‌وه‌ چ په‌یامێك ده‌داته‌ موسڵمان؟

مامۆستا كرێكار: پەیامی شەقاوەێتی و چەقاوەسوویی ئەمریکا و ترامپ دەداتە موسوڵمانە بێ کیانەکان. قودس دەمێکە لەژێر دەستی ئیسرائیلدایە. مەلیک حەسەنی ثانی _پاشای مەغریب_ سەرۆکی لیژنەی قوتارکردنی قودس بوو، مەلیک حسێنی _پاشای ئەدرەن_ پارێزەری پیرۆزێتی قودسبوو، ئیتر قودسیش وەکو کەرکووک نە دڵ دەرچوو نە پایتەختی موقەددەسی موسوڵمانان.. موسوڵمانان ئێستا مەککەو مەدینەیان بەدەستەوە نەماوە چجای قودس.. ئیسرائیل قۆناغ بە قۆناغ بەرەوە ئامانجە ستراتیژییەکانی دەکشێت و گوێ بەو کاردانەوانە نادات کە هەر لە گڕووی منداڵانی بێدەسەڵات دەچێت.. ئەوانەی لە دوورەوە خۆیان بۆ بەرگریی لە قودس گیڤ دەکەنەوە لە راستییدا بۆ مەرامیتر یان بۆ تۆمارکردنی هەڵوێستێک بۆ مێژوو وا دەکەن. دەنا سوپای مالیزیا لەو دوورەوە هاوار دەکات دەڵێ ئامادەین بۆ بەرگریی لە قودس لەشکر بنێرین!! ئەمە یەعنی چی؟ ئەی بۆچی بەرگریی لە موسوڵمانە موستەزعەفەکانی میانمار (بورما)ناکەن کە دراوسێ وڵاتیانن و هانا بۆ ئەوان دەبەن؟!  چما تا ئێستا فەردەیەک برنجی گەیاندۆتە غەززە تا لەشکر بنێرێت بۆ رزگارکردنی قودس؟!

دووربین: زیندانه‌كانی سعوودیه‌ كه‌ پڕبووه‌ لە موسڵمانی خواویست و زانایانی به‌ڕێز نابێته‌ هۆكارێك بۆ ڕمانی ته‌ختی تاغوتی ئال سعود؟

مامۆستا كرێكار: ان شاءاللە دەبێتە هۆکارێکی تری بەتین، بەڵام رمانی عەرشی گەورە طاغووتی سعوودی دیدێکی مەنهەجیی و کۆمەڵکارییەکی پتەوو بزاوتێکی شیاوی دەوێت، کۆمەڵیک هەل و مەرجی تایبەت بە ساحەی خۆی دەوێت، جونکە طاغووتانی ئال سعوود رەگیان داکوتاوەو بوون بە خاوەنی هەموو پێکهاتەکانی هێزی زۆرو زێڕ.. وەکو: هێزی دین و لێکدانەوەی، هێزی سەربازیی و ئەمنیی، هێزی ئابووریی و دارایی، هێزی هاوپەیمانێتی بەرگریی.. خاوەنی سەدان مەڵبەندو دائیرەی لەخۆگرتن (ئیحتیوا) و دەیان دەزگای داپڵۆسینن. ئەمانەش بە شۆڕشێکی ریشەیی لەبندێن.

دووربین: شیكاری به‌ڕێزتان چیه‌ بۆ ئه‌وه‌ی له‌ عفرین رووده‌دات؟

مامۆستا كرێكار: شەڕی عەفرین کێبڕکێی دەستشکانەوەو گەمەی سیاسەتبازانی نێودەوڵەتییە بەڵام لەوێش کوردە عەلمانییە کەللـەپووتەکان بەردی شەترەنجەکەن..

   شەڕو پێکدادان لە عەفرین کە لە نێوان سوپای تورکیاو هێزەپاشکۆکانی پەکەکەدایە، وەکو هەر شەڕێکی تری نێوانیان وایە کە پێشتر روویداوە، دوو بەرەی ململانێکە هەر هەمانن، کات و شوێنەکەو بارودۆخی نێودەوڵەتی گۆڕاوە، ئەمریکاو ئەوروپاو روسیاو ئیسرائیل و ئێران کە پاوەنخوازانە دەبزوێن، هەروەها و میسرو سعوودییەو ئیمارات کە لە خزمەت پرۆژەکانی دەوڵەتانی کوفردان، هەموویان زۆر ناڕەحەتن لە بە عملاقبوونی تورکیا:

_ لە بەهێزبوونی سوپای تورکیا کە بۆ یەکەمینجارە ووڵاتێکی رۆژهەڵاتی (تورکیا) چەک بفرۆشێت بە ووڵاتێکی ئەوروپایی (چەکی سووکی بە هۆڵەندا فرۆشت).

_ ناڕەحەتن لەوەی تورکیا یەکەمین هێزی ئەوروپاو دووەمینی پەیمانی ناتۆیە (دوای هێزی سەربازیی ئەمریکا)و لە زیادکردنی هێزەکەیدایە.

_ تورکیا فڕۆکەی جەنگی لە شێوەی ئێف 16ی ئەمریکایی دروست کردووە.

_ سارووخی ئێس ئێس 400 ی لە چین و ئێس ئێس 300ی لە روسیا کڕیوە.

_ سوپای تورکیا رووی لە دینداریی کردۆتەوە مزگەوت لە سەربازگەکانییدا دروست دەکرێتەوە.

_ پاشان لەهێزیی ئابووریی تورکیا، کە تەنها لە گەشتوگوازار ساڵانە 36 ملیار دۆلاری دەستدەکەوێت.

_ هێزی حزبی دەسەڵاتدار (دادوگەشە)و کاریزمایی سەرۆکەکەی (ئەردۆغان) و زیادبوونیی شەعبییەتی هەردووکیان.

_ پاراستنی تەوازوناتی پەیوەندییە نێودەوڵەتییەکان و خۆلادان لە پلانی لاوازکردن و پەلکێشانی بۆ جەنگی نێودەوڵەتی (دژی روسیا لە نیوەدۆرگەی قەرەم، دژی ئێران لە عیراق و سوریا)

   ئەمانەو دەیان خاڵی تری هێزی ناوەوە وا دەکات تورکیا بە راستیی لە 2030 دا ببێتە یەکێک لە (10 دە) وڵاتی پێشکەوتووی جیهان (وەکو ئەردۆغان رایگەیاند) ئەمانە وا دەکەن چاو لەسەر تورکیا زۆر بێت. یەکێک لە پلانی ئەمریکاو ئیسرائیل بۆ لاوازکردنی تورکیا بەکارهێنانی کوردە بۆ راکێشانی تورکیا بۆ ناوچەی کورد لە تورکیاو سوریا بۆ تێوەگلانی لە شەڕێکی توولانیی کە ئەمریکا 000ر30 پێشمەرگەی کوردی سوریای بۆ چەکدار دەکات. بۆ ئەوەی ئەگەر کوردەکانی سوریا ئەو سنوورە درێژەی باشووری تورکیانان کۆنترۆڵ کرد ئینجا سارووخی دوور مەدایان بدرێتی و بتوانن لەگەڵ پەکەکە لە ناو تورکیاوە تورکیا بگلێنن لە شەڕێکی عەبەسیی بێهوودەی وەکو شەڕەناوخۆکەی سوریا، ئەمەش دەکرێت هەموو دوژمن و ناحەزەکانی تورکیا دواتر دەستی تێوەردەن و تورکیا بکەن بە دەوڵەتێکی فاشیلی وەکو عێراق و سوریا و یەمەن و لیبیا، یان لانی کەم وەکو میسری لێبکەن..

   بۆ رێگرتن لەم پلانە شەڕخوازییە ستراتیجییە تورکیا هێرشی سەربازیی کردە سەر عەفرین تا رێ لە دروستکردن و گەشەکردنی ئەو لەشکرە جاش ئەمریکاییە بگرێت کە دەخوازێت لە عەفرینەوە بگاتە سەر دەریای سپی ناوەڕاست و لەوێوە ئاسان بە یۆنان و ئیسرائیلەوە (لە رێی رێڕەویی دەریایی نێودەوڵەتییەوە) پەیوەست ببێتەوە..

ساڵی 2023 مەرجەکانی کەرزۆن (بەناوی وەزیری دەرەوەی ئەو کاتەی بەریتانیاوە ناونراوە) لەسەر تورکیا تەواو دەبێت کە لە ساڵی 1923 دا لە شاری لۆزانی سویسرا بەسەر حکومەتی مستەفا کەمالدا سەپاندیان. کە نابێت تورکیا تا سەدساڵی ئایندە نەوت لە خاکی خۆیدا دەربهێنێت و دەبێ هەرچی رسوماتی پارە کە لە تەنگەی بوسفۆر (کە وەکو کەناڵی سوێسە)  وەریدەگرێت دەبێت بیداتە ووڵاتە هاوپەیمانەکانی ئەوروپا کە براوەی جەنگی جیهانی یەکەمبوون و هەندێک مەرجیتری وەکو ئیلغاکردنەوەی خیلافەتی ئیسلامی و دەرکردنی کۆتا خەلیفەی عوسمانی (سوڵتان عەبدولمەجید) بۆ سویسرا (نەک بۆ حیجاز کە خۆی داوای دەکرد) هەروەها موسادەرەکردنی سەروەت و سامانی خەلیفەو ئەوقاف و ئەوەی کە پەیوەندی بە سیستمی سیاسیی و ئابووریی ئیسلامییەوە هەبێت!.

4981 جار خوێندراوه‌ته‌وه‌
25/01/2018
           
© Copyright 2018 All Rights Reserved.