ئێمە کێین؟

ئێمه‌ی موسوڵمان كه‌ ئێستا ره‌وتێكی نوێی ئیسلامی كوردستانین باوه‌ڕمان وایه‌ كه‌ ئیسلام دیـنی ئوممه‌تێكه‌ به‌ بزاڤێكی شیاو جاهیلییه‌ت ده‌گۆڕێت، تا خواپه‌رستی و دادپه‌روه‌ریی له‌ دارالاسلامێكدا بچه‌سپێت

ئێمه‌ش هه‌ر وه‌كو ئه‌و موسوڵمانانه‌ین!

 

   ئێمه‌ش وه‌كو زۆرینه‌ی ئیسلامیان و شه‌رعناسانی ئه‌هلی ئیسلام ئه‌م دینه‌ له‌ سه‌رچاوه‌ سه‌ره‌كییه‌كانی خۆیه‌وه‌ وه‌رده‌گرین كه‌ قورئان و سووننه‌ت و كۆڕای زانایان و قیاسه‌، هه‌مووی به‌ پـێی دیدی سه‌له‌ف وه‌رده‌گرین كه‌ بریتین له‌ یاوه‌رانی پێغه‌مبه‌ری پێشه‌وامان صَلَّى اللَّهُ عَلَيْهِ وَسَلَّمَ و نه‌وه‌ی یه‌كه‌مینی شوێنكه‌وتووانیان كه‌ پێیان ده‌وترێت (تابعین) پاشان نه‌وه‌ی به‌رده‌ستی ئه‌وانیش كه‌ پێیان ده‌وترێت (تابیعی تابیعین). له‌و لێكدانه‌وانه‌ی ئیمامانی پێشه‌وای ئیمان و قورئانه‌وانی وفه‌رمووده‌وانی وشه‌رع و ئوصوڵی شه‌رع ده‌رناچین..

   ئێمه‌ش وه‌كو زۆرینه‌ی ئیسلامیان و شه‌رعناسانی ئه‌هلی ئیسلام، ئه‌م ئیسلامه‌ رێبازمانه‌، چونكه‌ كه‌سایه‌تی فیكرییمان جێگیرانه‌ داده‌ڕێژێت، دیدو تـێڕوانین و پێناسه‌مان له‌ هه‌موو مه‌یدانه‌كانی پێویستی به‌شه‌رییدا ده‌داتێ، وه‌ك: مه‌یدانی فیكرو تێڕوانیـنی فه‌لسه‌فی بۆ پێناسه‌ی مرۆڤ و گه‌ردوون و ژیان و پێكهاته‌و چاره‌نووسی هه‌ر یه‌كه‌یان. ئه‌مه‌ مه‌یدانی مه‌عریفی فه‌لسه‌فی وفیكریی وعه‌قائیدی ئێمه‌یه‌.. هه‌ر هه‌مووی له‌ سه‌وابیتی هه‌ردوو وه‌حیه‌كه‌وه‌ هاتووه‌: قورئان وسوننه‌ت..

ئێمه‌ش وه‌كو زۆرینه‌ی ئیسلامیان و شه‌رعناسانی ئه‌هلی ئیسلام ئه‌م دینه‌ رێبازمانه‌، چونكه‌ كه‌سایه‌تی سیاسییمان له‌سه‌ر كۆمه‌ڵێك بنه‌ماو نه‌ریتی سیاسی داده‌مه‌زرێنێت كه‌ ئه‌وانیش نه‌گۆڕ (سه‌وابیت)ن وه‌كو رێسا سه‌ره‌كییه‌كانی (عه‌قیده‌ت و عیباده‌ت و شه‌ریعه‌ت)ـه‌كه‌ی كه‌ سێ مه‌یدانی ته‌وحیده‌كه‌ن.. خیتابی سیاسیمان بۆ ناساندنی دارالاسلامێكه‌ كه‌ میلله‌ت ده‌سه‌ڵاته‌ سیاسیه‌كه‌ی هه‌ڵده‌بژێرێت تا ئازادی و دادو یه‌كسانی بۆ هه‌موان دابین بكات.

   ئێمه‌ش وه‌كو زۆرینه‌ی ئیسلامیان و شه‌رعناسانی ئه‌هلی ئیسلام ئه‌م دینه‌ رێبازمانه‌، چونكه‌ كه‌سایه‌تی رۆشنبیرییمان به‌ واقیعـبینی گۆش ده‌كات، تا خه‌یاڵ پڵاوانه‌ بۆ شت نه‌چین، فێرمان ده‌كات وه‌سفی شت له‌ سیفه‌تی زاتـیی شته‌كه‌وه‌ بێنین یان راستگۆیه‌كی پسپۆڕ حه‌قیقه‌تی ئه‌و شته‌مان بۆ باس بكات، كه‌ باسی راستگۆكانیش زۆربوون و بوون به‌ (متفق علیه‌) وه‌سف و پێناساندنی ده‌كه‌ین تا هه‌ڵوێستی راستی له‌سه‌ر بینابكرێت.. ئه‌مه‌ خوێندنه‌وه‌و ناسینی واقیعیانه‌ی هـێزه‌ ده‌به‌ڕێكڕاچووه‌كان و شێوازی كارو كاریگه‌رییانمان ده‌خاته‌ به‌رده‌ست، ئه‌مه‌ مه‌ڵبه‌نده‌كانی بڕیاری كۆمه‌ڵگه‌و ناوچه‌كه‌مان پێ ده‌ناسێنێت، بۆ ئه‌وه‌ی له‌گه‌ڵ هـێزه‌ واقیعیه‌كاندا خه‌یاڵاویانه‌ ره‌فتار نه‌كه‌ین و هه‌ڵوێستی نه‌شیاو نه‌گرینه‌ به‌ر..  

   ئێمه‌ش وه‌كو زۆرینه‌ی ئیسلامیان و شه‌رعناسانی ئه‌هلی ئیسلام ئه‌م دینه‌ رێبازمانه‌، چونكه‌ كه‌سایه‌تی ده‌روونیمان به‌ ته‌زكیه‌ی نه‌فس پارسه‌نگ راده‌گرێت.. پارسه‌نگی نێوان ره‌وشتی ره‌سه‌ن و ئینفیعالی كاردانه‌وه‌، كاتی تووڕه‌یی ناهێڵێت دادی خواوویستی فه‌رامۆش بكرێت، ناهێڵێت له‌به‌ر له‌سه‌ر كردنه‌وه‌ی هیچ كه‌سێك سنوری شه‌رعه‌كه‌ ببه‌زێنرێت. له‌ ناخی هه‌ر یه‌كێكدا ئه‌مه‌ به‌ پـیرۆزی ده‌ڕوێت كه‌ كه‌س له‌سه‌رو شه‌رعه‌وه‌ نه‌بێت.. له‌ دیدی دیـنی ئێمه‌دا هـێز داد نیه‌، داد هـێزه‌. هـێز بۆ پاراستن و جێبه‌جێ كردنی داده‌، نه‌ك بۆ پاراستنی سته‌م و گه‌نده‌ڵـیی سیاسه‌تبازانی چه‌واشه‌كار..

   ئێمه‌ش وه‌كو زۆرینه‌ی ئیسلامیان و شه‌رعناسانی ئه‌هلی ئیسلام ئه‌م دینه‌ رێبازمانه‌، چونكه‌ زادێكی زانیاریی چاوڕوونی به‌ هه‌ر هه‌موو شوێنكه‌وتووانی ده‌به‌خشێت له‌ عه‌قیده‌و فیكر، له‌ قورئانه‌وانی، له‌ سیره‌و سوننه‌ت، له‌ شه‌رع و ئوصوڵ و رێساكانی، له‌ بانگه‌وازو كۆمه‌ڵكاریی، له‌ ململانـێی شارستانێتی و پۆلێنكردنی كه‌س و كۆمه‌ڵ و به‌ره‌كان، له‌ خۆپه‌روه‌رده‌كردن و پارسه‌نگی ره‌فتارو به‌هه‌ند وه‌رگرتنی قیه‌م و نه‌ریت و ئادابه‌ كۆمه‌ڵایه‌تیه‌كان..

  ئێمه‌ش وه‌كو زۆرینه‌ی ئیسلامیان و شه‌رعناسانی ئه‌هلی ئیسلام ئه‌م دینه‌ رێبازمانه‌، چونكه‌ كه‌سایه‌تی كۆمه‌ڵكاریمان به‌ ئینتیمای ئوممه‌تێكی عه‌قائیدیانه‌ی سه‌ربه‌خۆی خۆگرانه‌ داده‌مه‌زرێنێت، قورسایی بانگه‌وازی خواییمان ده‌خاته‌ سه‌ر، ته‌وحیدمان پێ ده‌كاته‌ داینه‌مۆی بزاوتێكی كۆمه‌ڵایه‌تی گۆڕان و گۆڕین، له‌ یه‌كه‌م هه‌نگاوی ئاڕاسته‌شیه‌وه‌ ئاماده‌باشی رووبه‌ڕووبوونه‌وه‌ی جاهیلییه‌تمان تێدا ده‌خوڵقێنێت و بۆ ململانێ فیكریه‌كه‌مان داده‌مه‌زرێنێت، جوامێرانه‌ سه‌برمان له‌سه‌ر هه‌رزه‌یی ئه‌بوله‌هه‌ب و جه‌به‌رووتی ئه‌بوجه‌هل پێده‌گرێت، به‌ڵام به‌ شێوه‌یه‌ك كه‌ ئه‌گه‌ر به‌رامبه‌ر رایكێشاینه‌ جه‌نگی گه‌رمه‌وه‌ جورئه‌ت و توانای رووبه‌ڕووبوونه‌وه‌یمان هه‌بێت نه‌ك فس ده‌ینه‌وه‌و به‌ كه‌یفی خۆی لێمان بكوژێت..

   ئه‌مه‌ دیدی دیـنی و كۆمه‌ڵكاریمانه‌، ته‌ماعمان له‌ ماف و خوێنی كه‌سدا نیه‌، چونكه‌ سنوری ئێمه‌ كۆتایی پێدێت كه‌ سنوری كه‌سانی تر ده‌ست پێده‌كات.. سنوری دیدو فیكر، بیروباوه‌ڕو تـێڕوانین، سنووری رێبازو هه‌ڵوێستی سیاسی، سنوری كه‌سایه‌تی و خاوه‌نێتی، سنوری نه‌ریت و كلتورو هه‌موو سنوره‌كانی تری تاك و كۆ..

   ئه‌مه‌ ئێمه‌ین.. له‌ ناخی تاك تاكی خۆماندا ئوسوڵیین، دیدمان دیدی قورئان و سوننه‌ته‌و به‌ موو له‌ سه‌وابیته‌كانمان لا ناده‌ین.. فێڵ له‌ كه‌س ناكه‌ین، كه‌س چه‌واشه‌ ناكه‌ین.. له‌ بازنه‌ی تاك و كۆی خۆماندا دینه‌كه‌مان به‌ توندی ده‌گرین و  له‌ سنوری خه‌ڵكیشدا كراو(لیبراڵ)ـانه‌ ده‌وه‌ستین..

   زۆر له‌ خه‌ڵكی له‌و رووه‌وه‌ ده‌مانناسن كه‌ موسوڵمانی ئوسوڵین.. هه‌مووشیان جگه‌ له‌وانه‌ی ده‌سه‌ڵاتی سیاتبازان چه‌واشه‌ی كردوون، ده‌زانن سه‌ر به‌ هیچ هێزێكی ده‌ره‌كی نین وه‌كو كه‌ كۆمه‌ڵ سه‌ر به‌ ئێرانه‌و یه‌كگرتوو سه‌ر به‌ ئیخوانی نێوده‌وڵه‌تیه‌و كه‌تائیب سه‌ر به‌ قاعیده‌یه‌و مه‌دخه‌لیش سه‌ر به‌ سعودیه‌یه‌.. دیسان خه‌ڵكی مه‌گه‌ر ئه‌وانه‌ی لێمانه‌وه‌ دوورن ده‌نا هه‌موو ده‌زانن كه‌ ئێمه‌ سۆفی نین، نوورچی نین، نه‌ سه‌ر به‌ مه‌لای پارتی و نه‌ سه‌ربه‌ مه‌لای یه‌كێتی و نه‌ سه‌ر به‌ مه‌لای فه‌رمانبه‌ری ئه‌وقافیشین.. كه‌وابوو دیاره‌ پۆلی هه‌شته‌مینی ئیسلامیه‌كانین به‌ڵام خاڵی سه‌ره‌كی جیاوازیمان ئه‌وه‌یه‌ كه‌ كوردستانین.. به‌ڵام بۆچی كوردستانین.؟!

   سه‌ر به‌ هیچ ده‌وڵه‌تێك نه‌بووین و نین، چونكه‌ ئه‌و ده‌وڵه‌ته‌ی پێویسته‌ وه‌كو موسوڵمان وه‌لائی بده‌یـنێ خیلافه‌تی ئیسلامیه‌، كه‌ ئێستا وجودی نییه.

ده‌وڵه‌تانی ئێستاش هـی ئه‌وه‌ نین لێیان نزیك بینه‌وه‌، چونكه‌ ده‌وڵه‌تان بزاوت و كۆمه‌ڵه‌كان ده‌خه‌نه‌ بازنه‌ی به‌رژه‌وه‌ندی خۆیانه‌وه‌و به‌ ده‌گمه‌ن بزوتنه‌وه‌كان ده‌توانن له‌ كاریگه‌ریی ئه‌و ده‌وڵه‌تانه‌ ده‌رچن كه‌ پێیانه‌وه‌ په‌یوه‌ست بوون.. 

 

بۆ ئومه‌می بوونیش: ده‌زانین دینه‌كه‌مان نێونه‌ته‌وایه‌تیه‌و پێویست ده‌كات شوێنكه‌وتووانی ئوممه‌می بن، به‌ڵام واقـیعی ئێستای ئێمه‌و باقیه‌كه‌ی تری ئه‌هلی ئیسلام، نه‌ ئوممه‌ته‌ موسوڵمانه‌كه‌ (پێشڕه‌وه‌ عه‌قائیدیه‌كان) و نه‌ ئوممه‌ته‌ ئیسلامیه‌كه‌ (خه‌ڵكه‌ موسوڵمانه‌ جوگرافیاییه‌كه‌ی) له‌ ئاستێكدا نین ئاسان به‌ یه‌ك كۆمه‌ڵكاریی ئوممه‌تیانه‌ بۆیان لێـبڕێین و ووزه‌مان له‌ بزاوتێكی ئومه‌میدا خه‌رج كه‌ین.. بزوتنه‌وه‌یه‌كی ئیسلامی وه‌هاشمان نه‌دیووه‌ ووزه‌مان له‌ ساحه‌ی خۆمانداو بۆ خۆمان به‌گه‌ڕخاته‌وه‌و نه‌ك بۆ خۆی.. له‌به‌ر ئه‌مه‌شه‌ نه‌بووینه‌ته‌ ئیخوان و قاعیده‌ یان كۆمه‌ڵی تری نێونه‌ته‌وه‌یی..

   باوه‌ڕمان به‌ عێراقـی جوگرافیایی نه‌بووه‌ تا به‌ ووڵاتی خۆمانی بزانین، چونكه‌ كیانێكی ئیستیعمارییه‌و وه‌كو كۆرپه‌یه‌كی زۆڵ له‌دایكبووه‌، له‌ ماوه‌ی نێوان ١٩٢١-١٩٢٥دا به‌ زۆریی سه‌ربازیی و چه‌واشه‌كاریی به‌شێك له‌ كورد، به‌شه‌ كوردستانی باشوورمان به‌و عێراقه‌ جوگرافیه‌ زۆڵه‌وه‌ لكاوه‌، له‌و رۆژه‌شه‌وه‌ كه‌ عێراقـی ئینگلـیز دامه‌زراوه‌ ئێمه‌ی كورد خێرمان له‌ حكومه‌ته‌ یه‌ك له‌دوای یه‌كه‌كانی به‌غدا نه‌دیووه‌، دیواره‌ نه‌فسیه‌كانی نێوان ئێمه‌و عه‌ره‌بی حاكم ئه‌ستوورتر بوون، به‌ درێژایی ناسۆره‌كانمان هه‌ر هه‌ستمان ده‌كرد كه‌سێكی سه‌رده‌شتی و قامیشلوویی و ئامه‌دیی زیاتر شین و شادیمان له‌گه‌ل ده‌گـێڕن وه‌ك له‌ خه‌ڵكی فه‌للوجه‌و نه‌جه‌ف.. ئه‌مه‌ش مانای خۆدابڕین و گه‌ل دابڕان نیه‌ له‌و شارستانێتیه‌ عاره‌بیه‌ ده‌وڵه‌مه‌نده‌ی بۆ هه‌زار ساڵ باڵی ئه‌مان و داهێنانی به‌سه‌ر نیوه‌ی سه‌ر زه‌میـنی زه‌مانی خۆیدا هێنابوو.. ئه‌مه‌ دابڕكردنی كورد نیه‌ له‌و یه‌كبوونه‌ فیكرییه‌ی هێشتا ئوممه‌ته‌ جوگرافیاییه‌كه‌ی له‌سه‌ر ماوه‌، كه‌ له‌ هه‌موو سه‌رده‌مانی مـێژووی موسوڵماناندا له‌به‌ر یه‌ك هه‌ڵنه‌وه‌شاوه‌ته‌وه‌. له‌به‌ر ئه‌مه‌شه‌ كه‌ ئێمه‌ عێراقـچیی نین. حه‌زمان له‌ سه‌رخستنی موسوڵمانانی عه‌ره‌بی عێراقـی" به‌ تایبه‌تی جیهادیه‌كانیان" هه‌یه‌، به‌ڵام ناشمانه‌وێت ببین به‌ به‌شێك لێیان، بۆیه‌ نه‌مانوویستووه‌ بچینه‌ ناوچه‌كانیان و لێیان بمێنینه‌وه‌..

   كه‌وابوو ئێمه‌ی ره‌وتی شاخ نه‌ سه‌ر به‌ ده‌وڵه‌تێكین و نه‌ نێونه‌ته‌وه‌یین و نه‌ عێراقچیشین.. ئێمه‌ باوه‌ڕمان به‌ كوردستانێتی بووه‌و هه‌یه‌، ئه‌مه‌ش شتێكی نوێمان نیه‌، هه‌ر كه‌س دۆكۆمێنته‌كانی كۆمه‌ڵه‌ی ئیسلامیمان له‌ ١٩٨٩ دا بخوێنێته‌وه‌ ده‌زانێت كه‌ كوردستانێتی ئێمه‌ له‌و سه‌رده‌مانه‌دا بوو كه‌ زۆر له‌ دوور ده‌ژیاین، له‌ پاكستان و له‌ ناو بزاڤه‌ جیهادیه‌ جیهانیه‌كاندا.. ئه‌و زه‌مانه‌ ئه‌قڵمان به‌وه‌ شكاوه‌ كه‌ واقیعبینیمان وامان لێده‌كات كوردستانیانه‌ بـیر كه‌ینه‌وه‌ نه‌ك عێراقیانه‌و نێو نه‌ته‌وه‌ییانه‌.. ئێستاش له‌ جاران زیاتر باوه‌ڕمان به‌ گرتنه‌به‌ری ئه‌و هه‌ڵوێسته‌ هه‌یه‌، چونكه‌ ئه‌و كه‌سه‌ی له‌ ناو میلله‌تی خۆیدا پێگه‌ی نه‌بێت، له‌ شوێنانی تر ره‌نجبه‌ره‌.. ناشمانه‌وێت كوڕی خۆمان بكه‌ین به‌ قوربانی كـچی خه‌ڵكی.. له‌گه‌ڵ ئه‌وه‌شدا كه‌ به‌ داخه‌وه‌ له‌ كوردستان كوردایه‌تیه‌وانانی كافر بازنه‌ی ژیانیان ئه‌وه‌نده‌ له‌سه‌ر ته‌سككردینه‌وه‌ كه‌ نه‌یانهێشت له‌ شاخ و كێوه‌كانیش بژین، به‌ڵام پێمان وا نه‌بوو كه‌ ده‌بێت ستراتیژێتی و ساحه‌ی خه‌باتی خۆمان بگۆڕین!!

   له‌م قه‌ناعه‌ته‌ ديـنی و دیده‌ كوردستانیه‌مانه‌وه‌یه‌ كه‌ به‌ بیرماندا نه‌هاتووه‌ به‌ ناوی دیبلۆماسێتیه‌وه‌ ده‌ست له‌ناو ده‌ستی داگیركه‌رانی نزیك و دووری كوردستان بنێین.. ئه‌مه‌ش مه‌بده‌ئه‌، ئێستا له‌ جاران سوورترین له‌سه‌ریی و هه‌ر ده‌ڵێین: له‌عنه‌ت له‌و سنوره‌ی كوردستانی دابڕ كردووه‌، له‌عنه‌ت له‌و كه‌سه‌ی كێشاوێتی و له‌عنه‌ت له‌و كه‌سه‌ش كه‌ باوه‌ڕی پێیه‌تی..

   له‌ سه‌ره‌تای بوونمانه‌وه‌ یه‌كێتی هه‌وڵی ریشه‌كێشكردنی خۆمان و دینه‌كه‌مانیدا، ده‌یان جار شه‌ڕی پێفرۆشتین وبۆ لاوازكردنمان ده‌ستی له‌ ده‌ستی هه‌موو دوژمنێكی دوورو نزیك نا، هه‌موو جارێكیش ده‌یدۆڕاندو باجێكی له‌ سه‌ربه‌ستی خۆی ده‌دا، تا به‌ ته‌واوی بووه‌ به‌ردی دامه‌ی ده‌ره‌كی و ئێمه‌ش هه‌ر ماین! فیكرمان ره‌سه‌نتر بوو، دیدمان به‌رفراوانتر بوو، پێگه‌مان له‌ دڵی جه‌ماوه‌ره‌كه‌شدا پته‌وتر بوو والحمد لله‌..

ئه‌مه‌ ئێمه‌ وه‌كو فیكرو موماره‌سه‌ی سیاسه‌ت.. ئه‌مما ئێمه‌و ئیسلامیانی كوردستان ئه‌وه‌ چوارچێوه‌ی كۆمه‌ڵكاریمان له‌ هه‌موویان واڵاتره‌ چونكه‌ ئێمه‌ باوه‌ڕمان به‌(بازنه‌ی ئینتیمای مزگه‌وتی)ی هه‌یه‌،چۆن هه‌موومان له‌ مزگه‌وتێك كۆده‌بینه‌وه‌و بێ پرسینی ئینتیمای حزبی له‌ دوای یه‌ك ئیمامه‌وه‌ به‌ڕیزی به‌ڕێز نوێژه‌كه‌مان ده‌كه‌ین و كه‌سمان له‌وه‌ی ته‌نیشتی ناپرسێت و ناترسێت كه‌ حزبێكی تره‌، ئاواش له‌ بازنه‌یه‌كی كۆمه‌ڵكاریی واڵاو ئاشكرادا له‌گه‌ڵ موسوڵماناندا ده‌كه‌وینه‌ كار.. ئێمه‌ له‌ دوای برایه‌كی مه‌دخه‌لی یان سۆفیه‌كه‌وه‌ نوێژ ده‌كه‌ین ئه‌گه‌ر ئه‌ویش له‌ دوای كه‌سی ئێمه‌وه‌ نوێژ نه‌كات، هه‌ر واشین به‌رامبه‌ر برایه‌كی كۆمه‌ڵ یان یه‌كگرتوو، یان برایه‌كی نوورچی یان ته‌حریرو ته‌بلیغ.. بۆ كاركردنی ئوممه‌تییانه‌ش به‌ هه‌موویان ده‌ڵێین با له‌ بازنه‌یه‌كی كۆمه‌ڵكارییانه‌ی مزگه‌وتیانه‌دا كۆبینه‌وه‌و هه‌موو راوێژكاریه‌كی سیاسه‌ت و هه‌ڵوێستمان له‌وێدا بێت.. ئه‌م بازنه‌یه‌ دیندارانی حزبه‌كان و سه‌ربه‌خۆكانیش له‌ خۆ ده‌گرێت.. بۆیه‌ ئێستا هه‌ر دینداره‌كانی ره‌وتی خۆمان به‌ هـی خۆمان نازانین و هه‌ر ئه‌وان ئاڕاسته‌ ناكه‌ین، به‌ڵكو دینداری حزب و لایه‌نه‌كانی تریش به‌ برای دیـنی خۆمان ده‌زانین و به‌ خاوه‌ن ماف ده‌زانین كه‌ كاروكارتێكردنیان له‌گه‌ڵدا ئاڵوگۆڕ بكه‌ین.. دینداری حزبه‌ عه‌له‌مانیه‌كانیش به‌ براو كه‌سی خۆمان ده‌زانین مادام له‌ بازنه‌ی ئیسلامدا مابن، ده‌مانه‌وێت ئه‌وانیش قه‌ناعه‌ت به‌وه‌ بكه‌ن كه‌ هه‌موومان بێینه‌وه‌ ناو بازنه‌ی ئینتیمای ئوممه‌ته‌ موسوڵمانه‌كه‌و به‌ هـێزی به‌ڵگه‌ی شه‌رعیه‌وه‌ هه‌ڵوێستی یه‌كتری راست كه‌ینه‌وه‌.  ئه‌وه‌ له‌ به‌رژه‌وه‌ندی خۆمان و ئیسلامه‌كه‌مانه‌، نامانه‌وێ ئه‌وانیش نه‌زانانه‌ بكه‌ونه‌ به‌ره‌ی كوفره‌وه‌. خوای گه‌وره‌ش هیدایه‌تی هه‌موو لایه‌كمان بدات و سه‌رمانخات.

 

 

           
© Copyright 2018 All Rights Reserved.